Në Itali, u nda nga jeta juristi Milto Tutulani (1893–1933), ish-Ministër i Drejtësisë në Kabinetin e Zogut, të formuar në fund të shtatorit 1925. Lindi në Berat. Studimet e larta i kreu në Fakultetin e Drejtësisë të Universitetit të Athinës. Në përfundim të studimeve pasuniversitare në Akademinë Internacionale të Napolit për Letërsi e Shkencë, mori titullin “Akademik”. Është zgjedhur deputet i Beratit në katër legjislatura, ministër në katër kabinete të ndryshme. Nën drejtimin e tij si ministër i Drejtësisë, u miratuan disa nga ligjet e rëndësishme dhe të përparuara për kohën, si Kodi Civil, Kodi Tregtar etj. (Në fotografi: Milto Tutulani)
Teksti: Muzeu Historik Kombëtar
Fotografia: © Muzeu Historik Kombëtar
Përpunim grafik: AHCF
