Më 19 prill 1999, te vendi i quajtur Rrasa e Koshares ra gjatë luftimit Sali Çekaj, veprimtar politiko-ushtarak për çlirimin e Kosovës, luftëtar i Ushtrisë Çlirimtare të Kosovës, dëshmor.
Më 19 prill 1999, në malet e Maznikut, në një betejë të ashpër me forcat serbe për të mbrojtur popullatën civile, ra heroikisht Shkëlzen Haradinaj, luftëtar dhe organizator i Ushtrisë Çlirimtare të Kosovës.
Më 18–20 prill 1881, u zhvillua Beteja e Shtimes dhe Slivovës, beteja më e rëndësishme që ushtria e Lidhjes Shqiptare së Prizrenit zhvilloi kundër ushtrive osmane.
Më 18 prill 1921, në Tiranë, në një familje me lidhje të afërta me Ismail Qemal Vlorën, lindi Nermin (Falaski) Vlora, shkrimtare, publiciste dhe studiuese.
Më 18 prill 1945, në Rumani u nda nga jeta Vilhelm Vidi (Wilhelm Wied), princ gjerman nga një familje protestante, i caktuar nga Fuqitë e Mëdha evropiane, në tetor 1913, në krye të shtetit shqiptar.
