Në Tiranë u nda nga jeta Avni Mula, këngëtar bariton, kompozitor, Artist i Popullit. Lindi në Gjakovë, në vitin 1928. Kreu studimet e larta në konservatorin “P. I. Çajkovski” të Moskës, ku u diplomua këngëtar lirik (1957). Filloi punën si solist në Teatrin e Operës dhe Baletit, duke realizuar role kryesore të repertorit operistik të kohës, përmes së cilave u dallua për nivelin e lartë të zgjidhjeve muzikore e skenike. Ndër to veçohen figura e Figaros (“Berberi i Seviljes”, Rosini), e Oneginit (“Eugjen Onegin”, Çajkovski) dhe e Gjetës (“Mrika”, Prenk Jakova). Zhvilloi veprimtari të pasur koncertore brenda dhe jashtë vendit. Veprimtarinë krijuese e nisi në gjysmën e dytë të viteve ’60 të shekullit XX, fillimisht në fushën e këngës e të romancës dhe më pas, si autor i veprave të mëdha vokale-koncertore (kantata, poema vokale etj.) dhe skenike, ku veçohen opereta “Karnavalet e Korçës” (1978) dhe opera “Borana” (1984). Ka marrë Çmimin e Republikës të Shkallës së Parë, është dekoruar me “Urdhrin e Flamurit” të Klasit I dhe me Urdhrin “Nderi i Kombit”. (Në fotografi: Avni Mula)
Teksti: Fjalor enciklopedik shqiptar – Vëll. 2, Akademia e Shkencave e Shqipërisë, “Kristalina-KH”, Tiranë, 2008, faqe 1772.
Fotografia: © https://www.teksteshqip.com/avni-mula/biografia
Përpunim grafik: AHCF
