Në Prishtinë shpërthyen demonstratat e studentëve të Universitetit të Prishtinës për pakënaqësinë ndaj kushteve jo të mira në të cilat jetonin dhe studionin. Kërkesat fillimisht me përmbajtje sociale, evoluuan në kërkesa që shpërfaqnin pakënaqësitë politike, shoqërore dhe kombëtare. Kërkesat e studentëve ishin një akumulim i pakënaqësive që kishin shqiptarët e Kosovës, për faktin se zgjidhja e çështjes së Kosovës dhe pozicioni i saj politik dhe kushtetues në ish-federatën jugosllave nuk ishte i barabartë me popujt dhe republikat tjera në ish-Jugosllavi. Këto padrejtësi politike, kombëtare, sociale, ekonomike ishin të akumuluara dhe shpërthyen në vitin 1981, me qëllimin që shqiptarët të kishin të drejta të barabarta me popujt e tjerë në Jugosllavi dhe për të pasur republikën e tyre. 11 marsi i vitit 1981 shënon ditën kur u vendos gurthemeli i Republikës së Kosovës. (Në fotografi: Moment nga demonstratat e studentëve.)
Teksti: Bujar Dugolli
Fotografia: © Agjencia Shtetërore e Arkivave të Kosovës
Përpunim grafik: AHCF
