U pushkatua pa gjyq Sabiha Kasimati, biologe, punonjëse shkencore. Lindi në Edrene (Adrianopol) të Turqisë Evropiane, në një familje nga Libohova. Më 1927 u kthye familjarisht në atdhe, u vendos në Korçë, dhe kreu Liceun Kombëtar. Punoi si mësuese në shkollën femërore të Korçës dhe në shkollën e mesme bujqësore amerikane të Kavajës (1931–1936). Më 1936, filloi studimet e larta për biologji (dega e iktiologjisë) në Universitetin e Torinos. Më 1941, mbrojti doktoraturën dhe u kthye në atdhe. Punoi si mësuese e biologjisë në Institutin Femëror “Nëna Mbretëreshë”, në Tiranë (1941–1945). Filloi punën si kërkuese shkencore në Institutin e Studimeve, që me themelimin e tij (1946). Botoi disa artikuj shkencorë në revistën “Buletin i Institutit të Shkencave”. Grumbulloi një material të pasur për iktiologjinë e Shqipërisë, mbi bazën e të cilit do të hartonte një monografi. Më 20 shkurt 1951, u arrestua lidhur me incidentin e bombës në ambasadën sovjetike bashkë me 21 persona të tjerë të arrestuar për të njëjtën ngjarje. (Në fotografi: Sabiha Kasimati, viti 1942.)
Teksti: Fjalor enciklopedik shqiptar – Vëll. 2, Akademia e Shkencave e Shqipërisë, “Kristalina-KH”, Tiranë, 2008, faqe 1130.
Fotografia: © https://fr.wikipedia.org/wiki/Sabiha_Kasimati
Përpunim grafik: AHCF
