15 shkurt 1944
U botua në Tiranë numri i parë i “Revistës letrare”, nën drejtimin e shkrimtarëve bashkëthemelues: Mitrush Kuteli, Vedat Kokona, Sterjo Spasse dhe Nexhat Hakiu. Meqenëse ishin njerëz të penës, zgjodhën fjalën për t’i thirrur ndërgjegjes kombëtare. Kuteli, ekonomist në profesion, numëronte në vitin 1944 disa vëllime të botuara (“Netë shqiptare”, “Kapllan Aga i Shaban Shpatës”, “Ago Jakupi” apo “Sulm e lot”). Po ashtu, Kokona, i diplomuar për drejtësi në Paris, kishte nisur të njihej në mesin e letrarëve me zhanrin e vjershave dhe të tregimeve (“Dritë e hije” dhe “Yje të këputura”). Krijimtaria e Spasses përfshin në shumëllojshmërinë e saj përkthime, artikuj, monografi, tregime dhe romane. Ndërsa Hakiu zotëronte, krahasuar me ta, më tepër përvojë në drejtimin e periodikëve, pasi kishte shërbyer si kryeredaktor i revistave “Përpjekja shqiptare” dhe “Shkëndija”. (Në fotografitë: Numri i katërt i “Revistës letrare”; Themeluesit e revistës: Mitrush Kuteli, Vedat Kokona, Sterjo Spasse dhe Nexhat Hakiu.)
Teksti: Arkivi Qendror Shtetëror
Fotografia: © Arkivi Qendror Shtetëror
Përpunim grafik: AHCF
