Në Vjenë (Austri) u formua shoqëria “Dija”, shoqëri patriotike e intelektualëve shqiptarë. Themeluesit e saj ishin intelektualët atdhetarë Gjergj Pekmezi dhe Hilë Mosi. Qëllimi i shoqërisë ishte ngritja e arsimimit të shqiptarëve duke kultivuar gjuhën e letërsinë shqipe. Në një kohë të shkurtër krijohen nëndegët e shoqërisë “Dija” në Prizren, Shkodër e Tiranë, krahas atyre në disa qytete brenda Austrisë ku vepronin aktivistë të njohur për çështjen shqiptare, si në Grac, Kllagenfurt, Strebendorf. Nën kujdesjen e shoqërisë “Dija” u botuan tekste në shqip për trevat shqiptare, aq të nevojshme. Ndër të parat ishte “Abetarja” me autor Ndue Palucën, kalendari “Shqiptari”, “Këndime për shkollat e para shqipe” etj. Veprimtaria e shoqërisë “Dija” të Vjenës është një gur i çmuar në themelet e shtetit dhe kombit shqiptar. Veprimtarët patriotë që përbënë këtë shoqëri, sot janë emra që shkëlqejnë në historinë e kulturën kombëtare. (Në fotografi: Anëtarë të shoqërisë “Dija” në Vjenë.)
Teksti: https://gazetadielli.com/dija-e-vjenes-110-vjet-ne-altarin-e-progresit-kombetar/
Fotografia: © Arkivi Qendror Shtetëror
Përpunim grafik: AHCF
