Në fshatin Llugë të Podujevës lindi Afrim Zhitia, veprimtar politik i lëvizjes ilegale, dëshmor. Në vendlindje kreu shkollimin fillor, ndërsa shkollën e mesme e kreu në Prishtinë. Si nxënës i Shkollës së Mesme Teknike në Prishtinë, në vitin 1982 përfshihet në organizatën ilegale Fronti Nacionalçlirimtar i Kosovës. Si anëtar i lëvizjes ilegale shpërndau trakte dhe afishe, me të cilat kërkoheshin të drejtat e shqiptarëve dhe denoncohej pozita koloniale e Kosovës në Serbi dhe në ish-Jugosllavi. Për shkak të aktivitetit të gjerë, grupi i Afrim Zhitisë u ndoq hap pas hapi nga organet e pushtetit. Në verën e vitit 1984 grupi zbulohet dhe anëtarët burgosen. Në gjyqin që u mbajt për këtë grup, Afrim Zhitia u dënua me katër vjet burg. Pas daljes nga burgu intensifikoi aktivitetin organizativ dhe e zgjeroi veprimtarinë kundër shtetit dhe pushtetit jugosllav. Në përballje me policinë serbe u vra në vitin 1989. (Në fotografi: Afrim Zhitia)
Teksti: Fjalor enciklopedik i Kosovës – Vëll. II, Akademia e Shkencave dhe e Arteve e Kosovës, Prishtinë, 2018, faqe 1815.
Fotografia: © https://sq.wikipedia.org/wiki/Afrim_Zhitia
Përpunim grafik: AHCF
