U themelua në Shkodër Kolegja Saveriane (Kolegja e Shën Françesk Saverit). U themelua në fillim si shkollë tregtare. Në vitet ’20 të shekullit XX, u shndërrua gradualisht në lice klasik. Zbatonte sistemin pedagogjik të Urdhrit të Jezuitëve, i njohur si Ratio Studiorum. Dallohej për disiplinën e rreptë pedagogjike dhe pedagogë të nivelit evropian. Kolegji kishte bibliotekën, arkivin, “Shtypshkronjën e Zojës së Papërlyeme” (themeluar më 1870) dhe një muze të ndarë në 4 seksione, ku dallohej një koleksion i pasur numizmatik. Në këtë kolegj kanë studiuar Luigj Bumçi, Luigj Gurakuqi, Faik Konica, Mati Logoreci, Gjovalin Gjadri etj. Studentët e diplomuar prej këtij kolegji themeluan më 1926 Shoqatën L.E.K.A. (Letërsi-Edukatë-Kulturë-Argëtim) dhe botuan njëkohësisht të përkohshmen kulturore “Leka”. Kolegja Saveriane u mbyll nga qeveria, më 1933, krahas shkollave të tjera private, për t’u rihapur më 1936. Deri në vitin 1946 shkolla u ndoq nga nxënës të krishterë (katolikë e ortodoksë) dhe myslimanë. Kolegja Saveriane u rihap në vitin 1992 dhe më 1994 mori emrin: Shkolla e mesme e përgjithshme “Pjetër Meshkalla”. (Në fotografi: Kolegja Saveriane, Shkodër.)
Teksti: Fjalor enciklopedik shqiptar – Vëll. 2, Akademia e Shkencave e Shqipërisë, “Kristalina-KH”, Tiranë, 2008, faqe 1208.
Fotografia: © https://www.vaticannews.va/sq/kisha/news/2021-10/17-tetorpervjetori-i-themelimit-te-kolegjes-saveriane-ne-shkoder.html
Përpunim grafik: AHCF
