Në Shkodër lindi Rrok Gera, ekonomist, anëtar korrespondent i Komisionit Financiar të Lidhjes së Kombeve në Gjenevë, ministër i Financave, ministër i Ekonomisë Kombëtare, bashkëdrejtues i revistës “Ekonomisti shqiptar”. Pas kryerjes së Kolegjës Saveriane në Shkodër, më 1917 iu dha bursë nga qeveria austro-hungareze dhe vazhdoi studimet në Akademinë Tregtare në Linz dhe Vjenë të Austrisë. Më 1924, qeveria shqiptare i akordoi një bursë për të vazhduar studimet e larta pranë Fakultetit të Marrëdhënieve Ekonomike Ndërkombëtare në Universitetin e Vjenës. Më 12 korrik 1928 mbrojti disertacionin me rezultate të shkëlqyera. Pasi kreu praktikën në Vjenë, u kthye në atdhe. Në qershor të vitit 1929, u caktua të shoqëronte albanologun e shquar austriak Friedrich Wallisch, që kish ardhur për një vizitë studimore në Shqipëri. Më vonë u emërua zëvendëskomisar në Bankën Kombëtare të Shqipërisë. Më 18 qershor 1930 u emërua sekretar i përgjithshëm në Ministrinë e Financave. Lidhja e Kombeve e zgjodhi anëtar korrespondent të Komisionit të Financave të saj. Më 25 tetor 1935, në kabinetin e kryesuar nga Mehdi Frashëri, u emërua ministër i Financave. Më 28 korrik 1944 u emërua ministër i Financave në qeverinë e Fiqiri Dines. Në këtë kohe bëri dhe projektin e kombëtarizimit të aksioneve të Bankës së Shqipërisë. Në shtator 1944 jep dorëheqjen dhe kthehet në Shkodër, pranë familjes. Por në janar të vitit pasues, u arrestua. Në Gjyqin Specialm të zhvilluar në Tiranë gjatë periudhës shkurt–prill 1945, u dënua me 10 vjet heqje lirie. Me amnistinë e parë përfitoi 5 vjet zbritje dënimi. U lirua në nëntor të vitit 1949. Nga janari i vitit 1950 e deri në prill 1951 punoi si shef llogarie në Ndërmarrjen e Lëndëve Djegëse në Shkodër. U arrestua sërish më 21 prill 1951. Për afër një vit e gjysmë, u mbajt në qelitë e Sigurimit në Shkodër e Tiranë. Në tetor 1952, Gjykata Ushtarake e dënoi me 20 vjet heqje, me akuzën se kishte “ndihmuar në pushtimin e Shqipërisë nga Italia fashiste dhe ka sabotuar rezistencën e popullit shqiptar”. Dënimin e vuajti në burgun e Burrelit. Por në 8 maj 1958, me vendim të Plenumit të Gjykatës së Lartë, u deklarua i pafajshëm dhe u lirua më 19 maj të po atij viti. U nda nga jeta papritur në vitin 1969. (Në fotografi: Rrok Gera)
Teksti: Fjalor enciklopedik i viktimave të terrorit komunist – Vëll. II, “West Print”, Instituti i Studimit të Krimeve dhe Pasojave të Komunizmit, Tiranë, 2013, faqe 338–339.
Fotografia: © https://javanews.al/
Përpunim grafik: AHF
